Om die gemeente so effektief as moontlik te bestuur, werk ons op die volgende manier:
- Ons kies lidmate (maksimum 15) om deel te wees van die kernleiers (kerkraad). Hulle vergader dan maandeliks om besluite te neem, te organiseer en toe te sien dat die ons visie al meer in die praktyk bereik word. Tydens hierdie vergadering word saam gebid, bestuursbesluite geneem en ‘n lang tyd spandeer aan oop gesprekke oor sake wat die gemeente raak (indaba).
- Die kerkraad het 'n verkleinde werksvorm met gedelegeerde magte, die dagbestuur. Enersyds moet hulle alle persooneelsake hanteer. Andersyds moet hulle spoedeisende sake (in opdrag van en met verslag aan die kerkraad) afhandel.
- Die kerkraad is egter nie die enigste leiers in die gemeente nie. Die leiers van bedieninge en kleingroepe word erken as die breë leiersgroep van die gemeente. Daarom word hulle betrek in visionering en beplanning.
- Die bedieninge in Coram Deo word as selfstandige werksgroepe hanteer. Daarom kan hulle hul bediening self beplan, befonds, bedryf en evauleer. Fondse wat hulle genereer word ook as trustfondse gesien en deur hulle hanteer -
sonder direkte beheer daaroor deur die kerkraad. - Om die werk in die gemeente so effektief as moontlik te laat verloop, het ons voltydse en deeltydse werkers wat die bediening in die gemeente fasiliteer. Hierdie span bestaan tans uit die leraar, die administratiewe bestuurder, ‘n jeugwerker, ‘n tuinbestuurder en ‘n skoonmaker. Die leraar is die spanleier en verantwoordelik vir toesig oor die werk van die ander personeel, asook vir hulle beroeps-
en persoonlike ontwikkeling. - Die finansies en administrasie van Coram Deo word (onder begeleiding van ‘n betaalde ouditeur en sy span) vanuit die kerkkantoor bestuur. Geouditeerde state word maandeliks aan die kerkraad voorgelê vir goedkeuring.
- Die leraar se taak is om die gemeente te begelei in die ontginning van die Woord en in hulle toerusting vir bediening. Hierbenewens is hy ook verantwoordelik vir visionering vir en oorhoofse koördinering van die gemeentelewe.
- Die lidmate is verantwoordelikheid vir hulle eie geloofslewe, en daarom om bestaande geleenthede aktief te benut vir hulle eie opbou en versorging; om die leiers bewus te maak van hulle spesifieke behoeftes; om hulle unieke bydrae tot die op-
en uitbou van die gemeente te maak; en om die gemeente finansieel te help versorg.
Ons glo dat lidmaatskap van Coram Deo impliseer dat elke lidmaat ‘n bydrae in die gemeente behoort te gee. En dat die finansies vir die versorging van die gemeente hoofsaaklik uit die dankoffers behoort te kom.
- Daarom sien ons dit as jou verantwoordelikheid om te sorg dat jy jou dankoffer na die gemeente bring. Jy kan dit doen deur die dankofferkoevert (wat saam met die Geesdrif aan hulle uitgestuur word) by die gemeentesentrum te besorg, deur internet betalings te doen of deur ‘n maandelikse debietorder te gebruik.
- Ons sien die Bybel se riglyn van ‘n tiende steeds as die riglyn vir Christene van vandag. Ons erken egter dat lidmate ook op ander plekke as die gemeente in God se saak betrokke kan wees. En gevolglik minder as ‘n tiende in die gemeente gee.
- Een maal per jaar (gedurende Oktober/November) hou ons ‘n spesiale tiendemaand insameling. Dan word die Bybelse beginsels oor hierdie saak in die eredienste uitgespel en ontvang lidmate ‘n spesiale koevert om hulle bydrae in te gee. Die idee is dat lidmate gedurende hierdie tyd hulleself moet ondersoek om te sien of hulle in hierdie opsig erns maak met God se riglyne. Daarom is dit ‘n tyd waarin ons hulle uitdaag om ‘n volle tiende in die kerkkas te gee. En selfs meer te gee indien die Here hulle daarvan oortuig.
- Die kerkraad hou (deur sorgvuldige beplanning en bestuur) toesig hou oor die aanwending van die inkomste.
- Om die nodige kontroles oor inkomste en uitgawes te doen, is ‘n ouditeursfirma ingekontrakteer om op maandelikse basis inkomstes en uitgawes te oudit. Hulle taak is verder om kritiese vrae oor sisteme, inkomstes en uitgawes te vra. En dan die kerkraad te bedien met raad oor hoe om die finansies van die gemeente so gesond as moontlik te hou.
- Bydraes wat aan bedieninge in die gemeente gemaak word (bv. dankoffers wat tydens Tienerfokus opgeneem word of lidmate wat ‘n deel van hul dankoffer vir ‘n spesifieke bediening spesifiseer) word in ‘n trustfonds vir die spesifieke bediening aangeteken en gebruik vir die uitgawes van die spesifieke bediening.
- Hoewel dit nie ‘n standaard item op die program van die gemeente is nie, kan spesiale projekte aangepak word om die finansies aan te vul.
In Coram Deo glo ons dat die Bybel duidelike riglyne gee oor die manier waarop ons geloof die bestuur van ons geld moet raak. Daarom gaan dit vir ons in die eerste plek oor die geloofsdimensie in hierdie saak. Ons glo:
- dat ons (wanneer ons ons offergawes bring) uitdrukking gee aan ons geloof in en ons aanbidding van God;
- dat ons ons offergawes aan God gee -
nie die kerk nie; - dat ons offergawes ‘n geloofsdissipline is wat ons geloofslewe verryk en verdiep;
- dat ons offergawes die versorging van die gemeente en die werk van bedieninge binne en buite die gemeente moet onderhou; en
- dat God self aan ons die erkenning sal gee wanneer ons ons geld en goed bestuur op ‘n manier wat sy saak op aarde bevorder.
Daarom gaan dit vir ons in beide die bymekaarbring en besteding van die finansies oor ‘n geloofsaak -
